Va aleykumus-Sələm va rahmətullah. Uca Allah insanları və cinləri Özünə ibadət üçün yaradıb: "Mən cinləri və insanları yalnız Mənə ibadət etmək üçün yaratdım". (əz-Zəriyət, 56). 

İnsanlara dində bilmədikləri məsələləri bilənlərdən soruşmağı əmr edib: "Əgər bilmirsinizsə, Zikr əhlindən soruşun". (ən-Nəhl, 43; əl-Ənbiya, 7).

Bilənlərə isə dini insanlara olduğu kimi çatdırmağı və haqdan heç bir şeyi gizlətməməyi əmr edib. Əksinə, gizlədənlərə Allahın, mələklərin və insanların lənətini yağdırıb: "Kitabda insanlara bəyan etdiyimiz açıq-aydın dəlilləri və doğru yol göstərən ayələri nazil etdikdən sonra onları gizli saxlayanlara həm Allah lənət edir, həm də lənət edə bilənlər lənət oxuyurlar! Yalnız tövbə edənlər əməllərini islah edənlər və haqqı bəyan edənlər istisnadır. Mən onların tövbəsini qəbul edərəm. Mən tövbələri qəbul edənəm, Rəhmliyəm!" (əl-Bəqərə, 159-160).

 

Buna görə də sualda olduğu kimi əqidə və mənhəclə suallara cavab verməmək icazəli deyildir. Əksinə bu öz batil mənhəclərini gizlədən bir çox həva əhlinin, hizbilərin və bidətçilərin yoludur. Amma bu məqamda demək ki, "sən ibadətlə məşğul ol", bu söz haqdır, lakin bununla batil qəsd olunur. Çünki ibadət yalnız gündəlik namaz və zikrlərdən ibarət deyildir. İbadətə həmçinin də dinin bütün macallarında haqla batili, haqq əhli ilə batil əhlinin arasını ayırd etmək, onları tanımaq da daxildir. Batili və batil əhlini insanlara tanıtmayan iki nəfərdən biri sayılır: ya onları tanımır, ya da onlarla bir səfdə durub, onları dəstəkləyir. Allah və Onun Rasulu (salləllahu aleyhi və səlləm) bizə batili və batil əhlini tanıtmış, sələflərimiz və bu günümüzədək onların yolunda olan din və sünnə imamları da daim bu mənhəc üzərində getmişlər. Bu zikr etdiyimiz mənhəci xoşlamayan bidət əhlindən başqası deyildir. 

 

Amma demək ki, "bunun doğru yolda olmaqla heç bir əlaqəsi yoxdur", bu kəlmə də əvvəlki kimi batildir. Əgər müsəlmanlar haqla batili, haqq əhli ilə batil əhlini tanımazlarsa, kimdən gəldi, nə gəldi götürərlərsə, onda hansı doğru yoldan söz gedə bilər?! Sələflər deyərdilər: "Elm sizin dininizdir, baxın dininizi kimdən alırsınız". Bu söz sələfi mənhəcinin şüarına çevrildi. 

 

Uca Allah doğru yolda olmayıb, salehləri özünə dost tutmayıb, Peyğəmbərin (salləllahu  aleyhi və səlləm) yolundan çıxan zalım barədə xəbər verərək deyir: "Həmin gün zalım kimsə barmaqlarını dişləyərək deyəcəkdir: "Kaş ki, mən Peyğəmbərin yolunu tutub gedəydim! Vay halıma! Kaş ki, filankəslə dost olmayaydım!" (əl-Furqan, 27-28).